व्यापारीलाई दुई लाख जरिवाना

सुनसरी । चामलको कनिका मिसाएर बेसार पिस्ने मिल र व्यापारीलाई दुई लाख रुपैया जरिवाना गरेको छ ।

धरान उपमहानगरपालिकाको अनुगमन टोलीले स्थलगत रिपोर्टको आधारमा उपभोक्ता हित संरक्षण ऐन २०७५ को दफा ३९ को १ (ख) वमोजिम २ लाख रुपैयाँ जरिवाना गरिएको प्रमुख प्रशासकीय अधिकृत मातृकाप्रसाद भटटराईले बताए ।

चण्डेश्वरी कुटानी पिसानी मिलमा अनुगमन गर्दा बेसारमा चामलको खुदी मिसाएर पिस्दै गरेको फेला परेको थियो । अनुगमन टोलीले तत्काल मिल बन्द गराएर मिसावट गरिएको १३ बोरा बरामद गरी उपमहानगरपालिका लगेको थियो भने ४५ बोरा बेसार मिलमै छोडेको थियो ।

मिल सञ्चालक र व्यापारीले जरिवाना रकम राजश्वमा जम्मा गरेपछि मिसावट गरिएको बेसार नष्ट गरिएको अनुगमन अधिकृत वेदप्रसाद सापकोटाले बताए ।