सखिया नृत्यको रौनकता हराउँदै

कञ्चनपुर । थारु समुदायका महिलाले देखाउने सखिया नृत्य हराउँदै गएको छ । कृष्ण जन्माष्टमीका दिनदेखि सुरु गरिने नृत्य दशैँसम्म देखाउने चलन रहे पनि नृत्यलाई छोट्याएर पाँचदेखि तीन दिन मात्रै देखाउन थालिएको छ । कोरोना महामारीका कारण सखिया नृत्यलाई छोट्याउनु परेको उनीहरुको भनाई छ ।

सखिया नृत्य सामूहिकरुपमा देखाइने भएकाले निकै भीडभाड हुने गरेको छ । भीडभाड हुने भएकाले नृत्यलाई छोटो अवधिका लागि देखाउने व्यवस्था मिलाएको थारु समुदायले जनाएको छ । थारु गाउँका भलाद्मी, बडघर, गुरुवा, केसौका आदिको बैठक बसी सखिया नृत्यको आयोजना गर्नका लागि छलफल गरेपछि नृत्यको व्यवस्थापनको चाजोपाँजो मिलाउने गरिन्छ ।

गुरुवा (झाँक्रीले) तान्त्रिक विधिद्वारा नृत्यमा सहभागिता जनाउने युवा युवतीलाई दुष्टात्माको भवितव्यवाट बचाउनका लागि पूजा र अनुष्ठान गरेपछि यस नाचको प्रारम्भ गर्ने चलन रहेको छ ।