- २१ भाद्र २०८३, आईतवार / Sep 6, 2026
अमेरिकाले नेपाल भ्रमण गर्ने आफ्ना नागरिकलाई उच्च सतर्कता अपनाउन आग्रह गरेको छ ।
रसुवागढी–टिमुरे–स्याफ्रुबेँसी क्षेत्र र नेपाल–चीन सीमा नाकामा यात्रा नगर्न सुझाव दिइएको छ ।
बाढी र पहिरोका कारण उक्त क्षेत्रमा यातायात तथा सञ्चार सेवा प्रभावित रहेको अमेरिकी विदेश मन्त्रालयले जनाएको छ ।
प्रभावित क्षेत्रमा खोज, उद्धार तथा पुनःस्थापनाको काम जारी रहेकाले जोखिम उच्च रहेको बताइएको छ ।
नदी किनार, होचा भूभाग, क्षतिग्रस्त पुल र अस्थिर भिरालो क्षेत्रबाट टाढा रहन यात्रुलाई आग्रह गरिएको छ ।
नेपाल भूकम्प, बाढी र पहिरोको जोखिममा रहेको भन्दै अमेरिकी नागरिकलाई स्थानीय सूचना नियमित रूपमा हेर्न सुझाव दिइएको छ ।
आकस्मिक स्वास्थ्य सेवा सीमित हुन सक्ने भन्दै यात्रा स्वास्थ्य बीमा गर्न पनि आग्रह गरिएको छ ।
काठमाडौं, २१ भदौ । संयुक्त राज्य अमेरिकाले नेपाल भ्रमण गर्ने आफ्ना नागरिकलाई उच्च सतर्कता अपनाउन आग्रह गर्दै रसुवा जिल्लाका केही क्षेत्रमा यात्रा नगर्न सुझाव दिएको छ ।
अमेरिकी विदेश मन्त्रालयले सेप्टेम्बर ४, २०२६ मा जारी गरेको नयाँ यात्रा सुझावमा नेपाललाई ‘दोस्रो स्तरको बढी सतर्कता अपनाउनुहोस्’ श्रेणीमा राखेको छ । रसुवा जिल्लाका केही क्षेत्रलाई भने ‘चौथो स्तरको यात्रा नगर्नुहोस्’ श्रेणीमा राखिएको छ ।
अमेरिकी विदेश मन्त्रालयले विशेषगरी रसुवागढी–टिमुरे–स्याफ्रुबेँसी क्षेत्र तथा नेपाल–चीन सीमा नाकामा कुनै पनि कारणले यात्रा नगर्न आग्रह गरेको छ । ठूलो बाढी र पहिरोका कारण उक्त क्षेत्रमा व्यापक क्षति पुगेको, यातायात तथा सञ्चार सेवा प्रभावित भएको र खोज तथा उद्धार एवं पुनःस्थापनाको काम जारी रहेकाले जोखिम उच्च रहेको अमेरिकी पक्षको भनाइ छ ।
यात्रा सुझावमा उक्त क्षेत्रमा थप बाढी तथा पहिरोको सम्भावनासमेत रहेको उल्लेख गरिएको छ । प्रभावित क्षेत्रअन्तर्गत भोटेकोशी, त्रिशूली र नारायणी नदी आसपासका बस्तीहरू पनि जोखिममा रहेको जनाइएको छ । अमेरिकी विदेश मन्त्रालयले नदी किनार, होचा भूभाग, क्षतिग्रस्त पुल तथा अस्थिर भिरालो क्षेत्रबाट टाढा रहन यात्रुलाई आग्रह गरेको छ । त्यस्तै, नेपाली अधिकारीहरूले जारी गरेका उद्धार, विस्थापन तथा सुरक्षा निर्देशनको पालना गर्न पनि सुझाव दिइएको छ ।
हराइरहेका आफन्त वा व्यक्तिको खोजी गर्न सर्वसाधारण वा विदेशी नागरिक आफैं विपद् प्रभावित क्षेत्रमा प्रवेश नगर्न अमेरिकी विदेश मन्त्रालयले चेतावनी दिएको छ । अमेरिकी यात्रा सुझावमा नेपाल नियमित रूपमा भूकम्प, बाढी र पहिरोको जोखिममा रहने मुलुकका रूपमा उल्लेख गरिएको छ । भूकम्प अचानक र पूर्वसूचनाबिनै आउन सक्ने तथा काठमाडौँ उपत्यकासमेत त्यसबाट प्रभावित हुन सक्ने चेतावनी दिइएको छ ।
विशेषगरी जुनदेखि सेप्टेम्बरसम्मको मनसुन अवधिमा भारी वर्षाका कारण अचानक बाढी र पहिरो आउन सक्ने, सडक अवरुद्ध हुने तथा भवन र पूर्वाधारमा क्षति पुग्न सक्ने अमेरिकी विदेश मन्त्रालयले जनाएको छ । यस्तो अवस्थामा उद्धार तथा सहायता प्राप्त गर्नसमेत कठिन हुन सक्ने बताइएको छ ।
यात्रा सुझावमा नेपालका स्वास्थ्य तथा आकस्मिक उपचार सेवाको क्षमता सीमित रहेकोसमेत उल्लेख गरिएको छ । काठमाडौँका अस्पताल अन्य क्षेत्रको तुलनामा तुलनात्मक रूपमा राम्रो भए पनि भीडभाड हुने, आवश्यक उपकरण तथा औषधिको अभाव हुन सक्ने र उपचारअघि नै शुल्क मागिन सक्ने अवस्थाबारे अमेरिकी नागरिकलाई सचेत गराइएको छ ।
विदेशी नागरिकको उपचार खर्च नेपाल सरकारले व्यहोर्न नसक्ने जनाउँदै अमेरिकी नागरिकलाई आवश्यक औषधि साथमै लैजान तथा यात्रा स्वास्थ्य बीमा गर्न सुझाव दिइएको छ । नेपाल भ्रमण गर्ने निर्णय गरेका आफ्ना नागरिकलाई स्थानीय सञ्चारमाध्यमबाट तत्कालीन सूचना तथा विपद्सम्बन्धी समाचार नियमित रूपमा हेर्न र आवश्यक परे यात्रा योजना परिवर्तन गर्न पनि अमेरिकी सरकारले आग्रह गरेको छ ।
