सभापति देउवाको संसदमा महत्वपूर्ण भूमिका निर्वाह गर्न सांसदहरुलाई निर्देशन

काठमाडौं । कांग्रेस सभापति शेरबहादुर देउवाले सांसदहरूलाई संसदमा महत्वपूर्ण भूमिका निर्वाह गर्न निर्देशन दिएका छन् । शनिबार बसेको कांग्रेस संसदीय दलको बैठकबाट सभापति देउवाले उक्त निर्देशन दिएका हुन । काँग्रेसका प्रमुख सचेतक रमेश लेखकले सांसदहरूलाई औपचारिक पोशाक लगाएर मात्रै संसद् बैठकमा सहभागी हुन निर्देशन दिए । उनले संसदीय दलको बैठकमा समेत दौरा, कोट, प्यान्ट र सारी लगाएर आउन आग्रह गरे ।

अर्को बैठक २६ गते बिहान ९ बजे बस्ने बताइएको छ । उक्त बैठकले सरकारलाई विश्वासको मत दिने कि नदिने भन्ने विषयमा निर्णय गर्ने छ । सभापति देउवाले पार्टीका नवनिर्वाचित सांसदहरूलाई बधाइ समेत दिएका थिए । बैठकपछि प्रतिक्रिया दिदै नेपाली कांग्रेसका महामन्त्री गगनकुमार थापाले नेपाली कांग्रेसले प्रधानमन्त्री पुष्पकमल दाहाललाई विश्वासको मत नदिने बताए ।

संसदका दोस्रो, तेस्रो लगायत अन्य दलहरुले गठबन्धन बनाएर साझा उम्मेदवार बनाएको अवस्थामा कांग्रेसले प्रधानमन्त्रीलाई विश्वासको मत नदिने स्पष्ट पारे । महामन्त्री थापाले नेपाली कांग्रेसको केन्द्रिय समितिको बैठक पुस २८ गतेबाट बस्ने र बैठकले निर्वाचन, राजनीतिक घटनाक्रमको बारेमा विस्तृत छलफल गर्ने जानकारी समेत दिए ।