- ३१ असार २०८३, बुधबार / Jul 15, 2026
कञ्चनपुर । कञ्चनपुरमा १४ वर्षीया बालिकाले शिशु जन्माएकी छन् । बेलौरी नगरपालिका–८ को कलकत्तामा बालिकाले शिशु जन्माएको घटना सार्वजनिक भएको छ । माघ ३ गते घटना भएको स्थानीयले बताए ।
बालिकाले शिशुलाई जन्म दिएको कुरा ढिलोगरी मात्र बाहिर आएको बेलौरी नगरपालिकाका उपप्रमुख जोगराम चौधरीले बताए ।
गाउँमा बुहारीको बच्चा हो भनेर देखाउन खोजे पनि स्थानीयले बालिकाले अवैध रुपमा शिशु जन्माएको थाहा पाएपछि घटना सार्वजनिक भएको हो ।
बालिकाले जन्म दिएको शिशु कसको हो ? भन्ने कुरा खुलेको छैन । स्थानीयबासिन्दाको दबाबपछि बालिकाका आमाबुवा भारतीय नागरिक विरुद्ध किटानी जाहेरी दिएको ईलाका प्रहरी कार्यालय बेलौरीले जनाएको छ ।
भारतको बरेलीका दयाराम गुप्ताको शिशु भएको दाबी गर्दै उनी विरुद्ध किटानी जाहेरी दर्ता गरिएको इप्रका बेलौरीका प्रमुख प्रहरी निरीक्षक दानसिंह भण्डारीले बताए ।
ती भारतीय नागरिक नातामा उनका भिनाजु पर्छन् । विवाह गर्ने भन्दै भगाएर भारत लैजाने क्रममा सीमा क्षेत्रबाट बालिकाको उद्धार गरिएको दाबी गरिएको छ ।
बेलौरीकै एक जना शिक्षक, बैंकका म्यानेजर र एक अर्का स्थानीय व्यापारीको नाम पनि बालिकासँग जोडिएकाले निष्पक्ष अनुसन्धान गर्नुपर्ने माग स्थानीयले गरिरहेका छन् ।
