आठबीस नगरपालिकाले ल्यायो ४९ करोड ७५ लाखको बजेट, पर्यटन प्रवर्द्धन र सांस्कृतिक सभ्यता संरक्षणमा जोड

दैलेख । आठबीस नगरपालिकाले आर्थिक वर्ष २०८०/०८१ क लागि नीति तथा कार्यक्रम सार्वजनिक गरेको छ । पूर्वाधार विकासलाई पहिलो प्राथमिकतामा राखेर आइतबार नीति तथा कार्यक्रम ल्याएको हो ।

सार्वजनिक नीति तथा कार्यक्रममा विद्युतिकरण, फोहोर व्यवस्थापन, साना तथा लघु जलविद्युत आयोजना र सौर्य विद्युतिकरणमा जोड, ९ वटै वडाहरुमा हेलिप्याड, सडक स्तर उन्नति, बसपार्क निर्माण, खानेपानी, सिचाई, नगरपालिकाको प्रशासकीय भवन निर्माणलगायतमा जोड दिएको छ । निर्माण सम्पन्न योजनाको मर्मत सम्भारका लागि कोष स्थापना जस्ता कार्यक्रम सार्वजनिक गरेको छ ।

यस्तै युवाहरूका लागि सिप र श्रमका साथ रोजगारी सृजन गर्ने, कृषि तथा पशुपालनमा व्यावसायिक बनाउने, स्वास्थ्य सेवाको गुणस्तरमा जोड, हरियाली नगरका रुपमा अभियान संचालन गर्ने कार्यक्रममा प्रस्तुत गरिएको छ ।

पर्यटन प्रवर्द्धन र सांस्कृतिक सभ्यता संरक्षणमा जोड
आठबीस नगरपालिकाले ल्याएको नीति तथा कार्यक्रममा पर्यटन प्रवर्द्धन र सांस्कृतिक सभ्यता संरक्षणलाई जोड दिइएको छ । नगरका प्रमुख पर्यटकीय क्षेत्रको पहिचान, संरक्षण र सम्वद्धनमा जोड दिइएको उप प्रमुख कल्पना थापाले बताइन् । महिलालाई आर्थिक आयआर्जन र सीपसंग जोड्न महिला तथा बालबालिकासँग उप–प्रमुख कार्यक्रम पनि समेटिएको थापाले बताइन् । उत्पादन, आयआर्जन र सीपसँग जोडेर लगे मात्र महिलाको उत्थान हुने उनको भनाइ छ ।

शिक्षा तर्फ
एसइई परीक्षामा प्रथम श्रेणीमा उत्तिण हुने एक जना दलित तथा एक जना गैर दलित विद्यार्थीलाई एक एक लाख प्रोत्साहन स्वरूप प्रति विद्यालयमा पचास हजार उपलब्ध गरिने छ । दिवा खाजा, सेनिटरी प्याड, छात्रवृत्ति लगायतका कार्यक्रमलाई निरन्तरता दिइएको बताइएको छ।

नगर उपप्रमुख कल्पना थापाले प्रस्तुत गरेको बजेटमा के छ त ?
नगर सभामा नगर उपप्रमुख कल्पना थापाले प्रस्तुत गरेको नीति तथा कार्यक्रममा उद्यम पेसालाई आधुनिक र उत्पादनमुखी बनाउने विषयमा जोड दिइएको छ । प्रत्येक वडामा कृषि तथा पशु प्राविधिकको व्यवस्था मिलाउने, महिला कार्यक्रम सञ्चालन गर्ने, कृषि खेतीमा जोड दिइएको छ ।

नगरपालिकाले ४९ करोड ७५ लाख को बजेट विनियोजन गरेको छ । आर्थिक विकास क्षेत्रमा २ करोड ४८ लाख ७५ हजार, सामाजिक विकास क्षेत्रमा ४ करोड ९७ लाख ५० हजार, पूर्वाधार क्षेत्रमा ९ करोड ९४ लाख, कार्यालय संचालन तथा प्रशासनिक क्षेत्रमा २९ करोड ८५ लाख अनुमानित विनियोजन गरिएको छ ।

तस्वीरः IT शेरबहादुर सिजापति