- १८ श्रावण २०८३, सोमबार / Aug 3, 2026
चितवन । चितवन राष्ट्रिय निकुञ्ज र आसपासका क्षेत्रमा गरी बिगत आठ वर्षमा २ सय २० गैँडा मरेका छन् । निकुञ्जमा ६४ गैँडा बुढो भएर र भिरबाट लडेर मरेका छन् भने १९ गैँडा दलदलमा फसेर र बाढीले बगाएर मरेका हुन् । आर्थिक वर्ष २०७२ र ७३ देखि हालसम्ममा २ सय २० गैँडा मरेका हुन । विगत आठ वर्षमा एक सय भाले र ७६ पोथी गैँडा मरेका छन् भने लिङ्ग पहिचान नभएका ४४ गैँडा मरेका छन् ।
बाघको आक्रमणबाट २०, चोरी शिकारीबाट नौ, करेन्ट लागेर आठ, बिरामी तथा रोगी भएर १२, खाडलमा परी तीन, विष सेवनले पाँच तथा कारण नखुलेका २९ गैँडा रहेको मरेका छन् । आर्थिक वर्ष २०७२ र ७३ देखि यता निकुञ्जमा सबैभन्दा बढी गैँडा आव २०७५ र ७६ मा मरेको कार्यालयको तथ्याङ्कले देखाएको छ । उक्त आवमा ४३ गैँडा मरेका थिए । सबैभन्दा कम आव २०७२ र ७३ मा १४ गैँडा मरेको निकुञ्जले जनाएको छ ।
आव २०६५ र ६६ देखि आव २०७९ र ८० सम्म ३ सय २३ गैँडा मरेका छन् । निकुञ्जमा गैँडाको सङ्ख्या बढ्दै जाँदा आपसमा जुधेर र बूढो भएर मर्नेको सङ्ख्या धेरै रहेको निकुञ्जले जनाएको छ । आव २०७३ र ७४ मा २५, आव २०७४ र ७५ मा २६, आव २०७६ र ७७ मा २६, आव २०७७ र ७८ मा ३३ र आव २०७८ र ७९ मा ३७ गैँडा मरेका छन् । चालु आवको हालसम्म १६ गैँडा मृतावस्थामा भेटिएको निकुञ्जले जनाएको छ ।
