- ५ असार २०८३, शुक्रबार / Jun 19, 2026
काठमाडौं । आज आमा पुज्ने महान् पर्व हो । वैशाखकृष्ण औंसीका दिन छोराछोरीले श्रद्धा र सम्झना गर्ने महत्त्वपूर्ण दिनका रुपमा लिइन्छ । आमालाई देवता समान मान भनेर मातातीर्थ औंसीलाई विशेष दिनसँग गाँसिएको हो । मातातीर्थ औंसी वैशाख कृष्ण अमावश्यका दिनलाई मनाउने चलन छ।
आमाको महत्त्वलाई सम्मान गर्दै नेपालमा मातृ दिवस तथा आमाको मुख हेर्ने दिनका रूपमा विशेष रुपले मनाइन्छ । जन्म दिने आमाप्रति आदर व्यक्त गर्न पौराणिक कालदेखि मनाइँदै आएको पर्व हो । आमाले गरेका महान् र कष्टपूर्ण कामहरूको सम्झना गरिने दिन हो । आमाप्रति सम्मान गर्दै गरिमा सम्झने दिन हो।
आमा जसले हामीलाई संसार देखाइन्, पाइला चाल्न तातेताते गर्दै सिकाइन् । दस महिनासम्म गर्भमा राखेर जन्माइन् । अनि काखमा राखेर पालिन्। देवीको प्रतिरूप अनि ममता कि खानी अनि बालापनामा हाम्रा हरेक इच्छा, आकांक्षा अनि चाहिएको कुरा पूरा गरिदिने, कल्पवृक्ष सरि, यस पृथ्वीलोकका सम्पूर्ण आमाहरूलाई कोटीकोटी नमन छ ।
आमाकै विशेष स्नेह र लालनपालनमा हामी हुर्किएका हुन्छौं । त्यसैले यस दिनलाई बडो धूमधामसँग आमाको सम्झना र मंगलमय कामना गर्दै मनाइन्छ । आमा हुनेहरू वा नहुनेहरूले पनि यस पर्वलाई परम्परागत रूपमा आफ्नो संस्कृतको एक प्रमुख अंगको रूपमा मनाउने प्रचलन चलिआएको छ ।
संसारको सबैभन्दा पवित्र नाता, आमा संसारको सबैभन्दा पवित्र सम्बोधन, आमा हामीमध्ये धेरैले सर्वप्रथम बोल्न सिकेको शब्द, आमा अनि पलपलमा सम्झना आउने, सुखदुःखमा झझल्को आउने एउटा अनुहार, आमा हो । हरेक वर्षको वैशाख कृष्णपक्षको औंसीमा आमाको मुख हेर्ने चलन छ, यस घडीलाई मातातीर्थ औंसी, मातृऔंसी एवं मातृ दिवस पनि भन्ने गरिन्छ ।
यसरी आमाप्रति विशेषभक्ति र भावयुक्त सम्मान गरिएको हुँदा यस दिनलाई आमाको मुख हेर्ने दिन भनिन्छ। बिहान सबेरै उठी स्नान गरी आमालाई उपहार प्रदान गर्ने, मिष्ठान्न भोजन खुवाई आमाको मुख हेर्ने र आशीर्वाद लिने गरिन्छ।
आज आमाबाट टाढा रहेका सन्तानहरू आमालाई भेट्न पुग्छन्। यसैले यस दिन सबै नेपालीहरूले आ–आफ्नो आमा हुने या नहुने सबैले यो पर्व धूमधामका साथ मनाउने गर्छन् । यसैले होला यो जन्म दिने आमा तथा जन्मभूमि स्वर्गभन्दा प्यारो र पवित्र हुन्छ।
