- १५ भाद्र २०८३, सोमबार / Aug 31, 2026
एजेन्सी । एक हप्ताका लागि युद्ध बिराम लागू गर्ने सुडानमा युद्धरत दुई पक्षबीच सहमति भएको छ । युद्ध बिरामका साथै शान्तिवार्ताका लागि आ–आफ्नो पक्षबाट प्रतिनिधि पठाउन समेत सरकारी सैनिक र आरएसएफ तयार भएको हो । युद्ध बिराम यहि मे ४ तारिखदेखि लागू हुने जनाइएको छ ।
युद्धरत सरकारी सेना र अर्धसैनिक बल आरएसएफबीच एक हप्ताका लागि युद्ध बिराम लागू गर्ने सहमति भएको हो । दुवै पक्षबीच यसअघि भएका युद्ध बिरामका कुनै पनि सहमति कार्यान्वयन भएका थिएनन् । सुडानको सेना र अर्धसैनिक बल प्यापिड सपोर्ट फोर्स (आरएसएफ) को नेतृत्वबीच शक्ति बाँडफाँटको विषय नमिल्दा गत अप्रिल १५ देखि दुवै सुरक्षा निकायबीच लडाइँ सुरु भएको थियो ।
दुवै सुरक्षा निकायबीच लडाइँ सुरु भएको सोमबार १८ दिन भइसकेको छ । दुवै पक्षले एक अर्कालाई युद्ध बिराम सम्झौता तोडेको आरोप लगाउँदै आएका छन् । सुडानको सेना र अर्धसैनिक बल आरएसएफबीच गत गत अप्रिल १५ तारिखदेखि सुरू भएको द्वन्द्वका कारण हालसम्म करिब ५ लाख सुडानी नागरिक घरबार विहीन भएका छन् । १ लाख भन्दा बढीले देश छाडिसकेका छन् ।
