ओमिक्रोनको असर घाँटीमा धेरै

काठमाण्डौ । कोरोना भाइरसको नयाँ भेरियन्ट ओमिक्रोनले फोक्सोमा भन्दा घाटीलाई हानी गर्ने एक अध्ययन सार्वजनिक भएको छ ।ओमिक्रोन भेरियन्टले फोक्सोमा कम असर गर्ने बेलायतमा ६ वटा अनुसन्धान समूहले गरेको अध्ययनले देखिएको हो । यसले घाँटीमा बढी असर गर्ने देखिएको युनिभर्सिटी अफ लिभरपुल मोलकुलर भाइरोलोजी रिसर्ज ग्रुपले प्रकाशित गरेको अध्ययनले देखाएको जनाइएको छ ।

युनिभर्सिटी कलेज लण्डनका भाइरोलोजी प्राध्यापक दीनन पिल्लेले अध्ययनमा ओमिक्रोन सङ्क्रमित बिरामीको फोक्सोमा कम हानी भएको पाइएको बताउनु भएको छ । मुसामा गरिएको अध्ययनले अन्य भेरियन्टले भन्दा ओमिक्रोनले फोक्सोलाई १० प्रतिशत कम हानी गरेको पाइएको हो । ओमिक्रोन सङ्क्रमित मुसाको तौल खासै नघटेको तथा निमोनिया भए पनि सामान्य मात्र असर देखिएको उल्लेख छ ।