- २८ श्रावण २०८३, बिहीबार / Aug 13, 2026
काठमाण्डौ । गर्मी बढेसँगै औलो, डेंगी, कालाजार, जण्डिस, टाइफाइड, झाडापखाला, हैजालगायत रोगको जोखिम धेरै हुने डाक्टरले बताएका छन् । विभिन्न संक्रमणजन्य रोगको जोखिम गर्मीमा बढ्न थालेको डाक्टरले बताएका हुन ।
गर्मी बढेकाले प्रशस्त मात्रामा शुद्धीकरण गरिएको वा उमालेको पानी र पानी पाइने फलफूल खानुपर्ने डाक्टरहरुले सुझाएका छन् । औलो, डेंगी, कालाजार जस्ता रोगबाट जोगिन लामखुट्टे र भुसुनाको टोकाइबाट बच्नु पर्ने, घर वरिपरिका झाडी तथा खाल्डाखुल्डी पुर्न, पूरा बाहुला भएका कपडा लगाउन र लामखुट्टे तथा भुसुनालाई भगाउने खालका औषधिको प्रयोग गर्न र सुत्ने बेलामा झुल टांग्न डाक्टरले सुझाएका छन् ।
प्रि–मनसुन र मनसुनमा लामखुट्टे तथा भुसुनाको टोकाइबाट लाग्ने रोगसँगै दूषित पानी, अस्वस्थकर खानेकुरा र सरसफाइको कमीका कारण संक्रामक रोग फैलिने जोखिम धेरै रहेको र सडक छेउछाउमा खुला रुपमा राखिएका खानेकुरा, बासी तथा सडेगलेका खाना नखाने र खाना खानु अघि सफासँग साबुनपानीले हात धुन जनस्वास्थ्य विज्ञले सुझाएका छन् ।
सामान्य कुरामा ध्यान दिन सके झाडापखाला, हैजा, जण्डिस जस्ता रोगबाट जोगिन सकिने डाक्टरहरुको तर्क छ ।
