- १० आश्विन २०८३, शनिबार / Sep 26, 2026
भैरहवा । गौतमबुद्ध अन्तर्राष्ट्रिय विमानस्थलमा पहिलो व्यावसायिक उडान भएको छ । कुवेती जजिरा जेजेड आर ५४५ एयरवस ए ३२०–२३३ विमानले सोमबार बिहान ७ बजे १७४ यात्रु लिएर उडान भरेको हो ।
प्रधानमन्त्री शेरबहादुर देउवाले विमानस्थलको उद्घाटन गरेका हुन् । दिल्लीबाट अन्तर्राष्ट्रिय विमानको रुपमा भारतीय सेनाले उडान गरेको थियो । विमानले भारतीय प्रधानमन्त्री नरेन्द्र मोदीको सुरक्षाकर्मी, सुरक्षा सामाग्री र बुलेट प्रुफ कार ल्याएको थियो ।
अब साताको ३ दिन जजिरा एयरलाईन्सले नियमित उडान गर्ने गौतमबुद्ध अन्तर्राष्ट्रिय विमानस्थलले जनाएको छ । जजिरा एयरलाईन्स सोमबार, बुधबार र शुक्रबार सातामा ३ दिन राति पौने २ बजे भैरहवामा अवतरण गर्ने र सोही राति अढाई बजे फिर्ता हुने तालिका रहेको छ ।
अहिले जजिराले १ सय ७५ जना क्षमता रहेको न्यारो बडी एयरबस ३२० भैरहवा ल्याएको छ । जुलाईदेखि जजीराले दैनिक उडान भर्ने विमानस्थल प्रशासनले जानकारी दिएको छ ।
