चुच्चे नक्सा निकाले पनि कालापानी क्षेत्रमा भएन जनगणना

काठमाडौं । प्रतिनिधि सभाको आइतबारको बैठकमा सांसदहरुले सरकारलाई कालापानी, लिपुलेक, लिम्पियाधुरामा जनगणना किन नभएको भन्दै प्रश्न गरेका छन् ।
प्रतिनिधि सभाको बैठकमा नेकपा (एकीकृत समाजवादी)का सांसद शेरबहादुर कुँवरले सभाको शून्य समयमा बोल्दै कालापानी, लिपुलेक, लिम्पियाधुरामा जनगणना नभएको विषय प्रतिनिधिसभामा प्रश्न उठाएका हुन् ।

‘यसपल्ट त्यहाँ जनगणना नभएको सुनेको छु। जबकि सन् २०१८ सालमा नै जनगणना भएको थियो। यसपल्ट त्यहाँ गणना किन छुटेको हो ?’उनले भने । उनले उक्त क्षेत्रको जनगणना नहुँदा राम्रो सन्देश नगएको टिप्पणी गर्दै २०१८ सालमा जनगणना भएको क्षेत्रमा अहिले किन जनगणना नभएको भन्दै प्रश्नसमेत गरे । कालापानी, लिपुलेक, लिम्पियाधुरामा जनगणना नहुनु नेपालको लाचारी पन भएको तर्क समेत गरे ।