- २८ असार २०८३, आईतवार / Jul 12, 2026
काठमाण्डौ । गत पुस १५ गतेदेखि हालसम्म ३५ हजार जनालाई डेङ्गी सङ्क्रमण पुष्टि भएको छ । इपिडिमियोलोजी तथा रोग नियन्त्रण महाशाखाका अनुसार नेपालमा हालसम्म झण्डै ३५ हजार जनालाई डेङ्गीको सङ्क्रमण पुष्टि भएको जनाएको छ ।
डेङ्गीको सङ्क्रमण नियन्त्रणतर्फ उन्मुख भए पनि जोखिम कायमै रहेको जनाएको छ । आउँदो कात्तिक महिनासम्म नै डेङ्गीको जोखिम रहने भएकाले लामखुट्टेको टोकाइबाट जोगिन डाक्टरले सुझाएका छन् । लामखुट्टेको टोकाइबाट बच्नु नै डेङ्गी सङ्क्रमणबाट जोगिनु एकमात्र उपाय हो ।
डेङ्गी भएर ३० जनाको ज्यान गएको छ । गत वार्ष ८८ जनाको ज्यान गएका थिए भने ५५ हजारभन्दा धेरै सङ्क्रमित भएका थिए । ज्वरो आउनासाथ र जिउ दुख्नासाथ धेरैले जथाभाबी औषधि खाने गरेकाले त्यसो नगर्न सुझाइएको छ ।
डेङ्गी भएका बेला दुखाइ कम गर्नका लागि खाइने बुफ्रिनलगायतका औषधिले स्वास्थ्यमा झनै असर पर्ने भएकाले स्वास्थ्यकर्मी र डाक्टरको सल्लाहमा मात्रै औषधि खान सुझाइएको छ ।
लामखुट्टेले फुल पार्ने र लार्भा हुर्कने वातावरण नबनाउन आग्रह गरिएको छ । घर वरिपरि पानी जम्ने खाल्डाखुल्डी पुर्न, पूरा बाउला भएका लुगा लगाउन, बाल्टी, बाटा, ड्रमलगायत भाँडोमा लामो समयसम्म पानी जम्मा गरेर नराख्न पनि सुझाइएको छ ।
