तराई–मधेशमा छठ पर्वको रौंनक

सर्लाही । मिथिला क्षेत्रमा छठपर्वको रौंनकता छाएको छ । सर्लाहीलगायत तराई–मधेशका नागरिक छठ पर्वका लागि आवश्यक पर्ने सामग्रीको किनमेल गर्नेको घुइचोले छठकको रौंनकता छाएको हो । दीपावली सकिएसँगै तराई–मधेशवासी छठ पूजाका सामग्री किनमेल गर्न व्यस्त छन्। जनकपुरधामसहित सम्पूर्ण तराई–मधेशका प्रमुख बजारमा चहलपहल बढेको छ।

कार्तिक शुक्ल पक्षको चौथी तिथिका दिनबाट छठपर्व विधिवत् रूपमा आरम्भ हुन्छ। छठ पूजाका लागि आवश्यक सामग्री, हरिया तरकारी र फलफूल किन्नेको बजार क्षेत्रमा निकै भीडभाड देखिएको छ। छठमा प्रसादका रुपमा केरा, फलफूल, पान, सुपारी, भण्टा, मुला किन्न अहिले सर्लाहीसहित सम्पूर्ण तराई–मधेशका प्रमुख बजारमा निकै चहलपहल बढेको छ ।

लक्ष्मी पूजाको चार दिनपछि अर्थात् कार्तिक शुक्ल पक्षको चौथी तिथिका दिनबाट छठ पर्व विधिवत् रूपमा हुने प्रचलन रहेको छ । छठी मातालाई स्याउ, केरा, सुन्तला, नरिवल, उखु, हरियो बोडी, पानी सिङ्गडा, मुला, अदुवाको बोट आदि प्रसादको रुपमा चढाइन्छ। यस समयमा माटो तथा बाँसका सामग्री पनि खरिद गर्ने परम्परा छ।

जनकपुरको गंगा सागर, धनुष सागर, अग्निकुण्ड, अङ्गराजसर, दशरथ तलाउलगायतका पोखरीजस्ता स्थानमा सूर्य देवता र छठी माताको पूजा आराधनाका लागि विशेष साजसज्जा गर्न थालिएको छ।

तराईका जिल्लामा छठ पूजाका लागि चाहिने सामग्री, हरिया तरकारी र फलफूल किन्नेको भीड लागेको छ । यो वर्ष छठ पर्वको मुख्य दिन मंसिर ३ गते परेको छ। छठको पहिलो दिनलाई ‘नहाय खाय’ भनिन्छ। यस दिन बिहान सरसफाइ गरी नुहाएर शुद्ध भोजन ग्रहण गरिन्छ।