दलहरूबीच सहमति जुटेन, सहमतिका लागि पाँच दिनकाे समय ताेकियाे

३ असार २०७७ काठमाडौं । नागरिकता विधेयकमा वैवाहिक अंगीकृतको विषयमा दलहरूबीच देखिएको विवाद अझै मिलेको छैन ।

संसदको राज्य व्यवस्था तथा सुशासन समितिमा छलफल जारीरहेको नेपाली नागरिकसँग विवाह गर्ने विदेशी महिलालाई ७ वर्षपछि मात्र अंगीकृत नागरिकता दिने र त्यसअघि आर्थिक, सामाजिक र संस्कृतिक अधिकार उपभोग गर्न पाउने गरी स्थायी आवासीय अनुमति पत्र दिने प्रस्ताव पेश भए पनि कांग्रेसले विमति जारी राखेको छ ।

नेकपाले यसलाई समर्थन गरेकाे छ भने कांग्रेसले विरोध जारी राखेको छ । संविधानमा नेपाली नागरिकसँग बिहे गरेर आएपछि उसले चाहेमा अंगीकृत नागरिकता लिन सक्ने भनिएको प्रावधानलाई नै मानेर जानुपर्ने र त्यही अनुसार ऐन आउनुपर्ने अडान कांग्रेसले लिएपछि सहमति जुट्न गाह्राे भएकाे हो ।

सहमति नजुटेपछि समिति सभापति शशी श्रेष्ठले सहमति जुटाउन पाँच दिनको समय दिएर बैठक सकिएको हाे ।