- ३० श्रावण २०८३, शनिबार / Aug 15, 2026
काठमाण्डौं । सरकारले दुधको मूल्य समायोजन प्रकृया थालेको छ । राष्ट्रिय दुग्ध विकास बोर्डमार्फत सातवटै प्रदेशमा अध्ययन गरिसकेको कृषि तथा पशुपन्छी विकास मन्त्रालयले जनाएको छ ।
एक समिति बनाएर अध्ययन गरी त्यसका आधारमा प्रतिवेदन तयार पार्ने काम भैरहेको बोर्डका प्रमुख राजेन्द्र यादवले बताए । आइतबार प्रतिवेदन मन्त्रालयमा बुझाउने समितिले तयारी गरेको छ ।
मन्त्रालयले उक्त प्रतिवेदन अध्ययन गरी दुग्धको मूल्य निर्धारण गर्ने बताएको छ । दाना, चोकरलगायत दुध उत्पादनका बस्तुको मूल्य बढेकाले दूधको मूल्य बढाउन किसान र उद्योगबाट प्रस्ताव आएको बोर्डको भनाइ छ ।
यस्तो अवस्थामा बोर्डले प्रतिलिटरमा ८ देखि १० रुपैयाँसम्म बढाउनेगरी गृहकार्य थालेको बताइएको छ । २०७६ भदौमा दूधको मूल्य ६ रुपैयाँले बढेर प्रतिलिटर ७६ रुपैयाँ तय भएको थियो ।
यसपालि कच्चा दुधकै मूल्य निर्धारण हुने र त्यसका आधारमा प्रशोधित दुधको अर्को मूल्य निर्धारण गरिने सरोकारवालाको भनाइ छ । प्रदेश कृषि तथा पशुपन्छी मन्त्री एवं बोर्डका अध्यक्ष बसुन्धरा हुमागाईंको अध्यक्षतामा बसेको बोर्डको बैठकले मूल्य बढाउन मन्त्रालयलाई अनुरोध गर्ने निर्णय गरेको छ ।
