- ३१ असार २०८३, बुधबार / Jul 15, 2026
काठमाडौं । सरकारले संसद्मा प्रस्तुत गरेको नीति तथा कार्यक्रममाथि छलफल हुँदैछ ।
प्रमुख प्रतिपक्षी दल एमालेका अध्यक्ष केपी शर्मा ओलीले नीति तथा कार्यक्रममाथि बोल्ने भएका छन् ।
एमाले उपाध्यक्ष तथा संसदीय दलका उपनेता सुवासचन्द्र नेम्वाङले भने, “हाम्रो पार्टीको तर्फबाट सरकारको नीति तथा कार्यक्रमबारे पार्टी अध्यक्ष तथा संसदीय दलका नेता पहिले बोल्नुहुन्छ ।
समसामयिक विषयमा पनि बोल्नुहोला ।” संसद्मा आजदेखि नीति तथा कार्यक्रममाथि छलफल हुँदैछ । शनिबार बसेको एमाले संसदीय दलको बैठकले सरकारको नीति तथा कार्यक्रमको सशक्त विरोध गर्ने निर्णय गरेको हो ।
अध्यक्ष ओलीले नीति तथा कार्यक्रमको सशक्त प्रतिवाद गर्न एमाले नेताहरुलाई निर्देशनसमेत दिएका छन् । नीति तथा कार्यक्रम दिशाहीन र अन्योलग्रस्त रहेको ओलीले बताएका छन् । सरकारले जनतालाई भ्रम पार्ने किसिमले नीति तथा कार्यक्रम ल्याएकाले उनको भनाइ छ ।
आजको प्रतिनिधि सभा बैठकमा प्रधानमन्त्री पुष्पकमल दाहाल प्रचण्डले सरकारको नीति तथा कार्यक्रममाथि छलफल प्रारम्भ गरियोस् भनी प्रस्ताव प्रस्तुत गर्ने कार्यसूची छ ।
आर्थिक वर्ष २०८०/०८१ नीति तथा कार्यक्रममाथि जेठ ११ गतेसम्म छलफलका लागि समय तोकिएको छ । छलफलका क्रममा सांसदहरुले उठाएका प्रश्नहरुको प्रधानमन्त्री प्रचण्डले जवाफ दिएपछि नीति तथा कार्यक्रम पारित हुनेछ ।
त्यसपछि जेठ १५ गते सरकारले आर्थिक वर्ष २०८०/०८१ को बजेट प्रस्तुत गर्नेछ ।
