- २६ भाद्र २०८३, शुक्रबार / Sep 11, 2026
ओखलढुंगा । चम्पादेवी गाउँपालिका ८ बिलन्दुमा भीषण वर्षापछि गएको पहिरोले ३ घर बगाएको छ । बिहीबार राति पहिरोमा परी ३ जनाको मृत्यु भएको छ भने १ जना बेपत्ता भएका छन् ।
घर पुरिँदा स्थानीय ३६ वर्षका रणबहादुर गुरुङ र उनकी पत्नी ३१ वर्षीया शिवमाया गुरुङ र १८ महिने छोरी कृतिका गुरुङको मृत्यु भएको हो । त्यसैगरी उनीहरुका १० वर्षका छोरा दिनेश गुरुङ बेपत्ता भएका छन् ।
बेपत्ताको खोजी कार्य भइरहेको जिल्ला प्रहरी कार्यालय ओखलढुंगाले जनाएको छ । स्थानीय बलबहादुर गुरुङ र जरसिंह गुरुङको पनि घर बगाएको छ । उनीहरु भने भागेर ज्यान जोगाउन सफल भएको डिएसपी दिपकबहादुर केसीले बताए ।
राति नै स्थानीयले प्रहरीलाई पहिरोबारे जानकारी दिएपछि नेपाल प्रहरी, सशस्त्र प्रहरीको टोली घटनास्थल पुगेर उद्धारमा खटिएको थियो । उद्धारका लागि थप प्रहरीसमेत जिल्लाबाट खटाइएको डिएसपी दिपकबहादुर केसीले बताए ।
