पोखरीमा डुबेर तीनै आमा छाेरीकाे मृत्यु

मोरङ । माछा पाल्ने पोखरीमा डुबेर दुइ छोरी र आमाको मृत्यु भएको छ । ग्रामथान गाउँपालिका–४ बनसखण्डीकी ३५ वर्षीय सीता अधिकारी, उनका १३ र ९ वर्षीया छोरीहरुको मृत्यु भएको हो ।

छोरी पबित्रा र कृतिका पोखरीमा डुबेपछि उद्धार गर्न गएकी सीताको त्यसैमा डुबेर मृत्यु भएको अनुसन्धानका क्रममा खुलेको इलाका प्रहरी कार्यालय बेलबारीका प्रहरी निरीक्षक ऋषिराज ढकालले बताए ।आइतबार दिउँसो माछा पाल्ने पोखरीमा सीताका दुई छोरी डिलमा कपडा खोलेर पसेको देखिएको प्रहरीको दाबी छ ।

पोखरी गहिरो भएका कारण तीनैजना निस्कन सकेनन् । घर नफर्किएपछि साँझमा खोजी गर्ने क्रममा पोखरी भित्र शव भेटिएको थियो । प्रहरीका अनुसार सीता दुई छोरीसहित माइतमा बस्दै आएकी थिइन् । उनका श्रीमान नौ वर्षयता सम्पर्कविहीन छन् । जानकारी पाएलगत्तै पुगेको प्रहरीले राति करिब ८ बजे शव पोष्टमार्टमका लागि कोशी अस्पताल विराटनगर पठाएको थियो ।