प्रचण्ड र ओलीबीच बालुवाटारमा छलफल

काठमाडौं । प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीबीच छलफल भएको छ । शुक्रबार बिहानैदेखि बालुवाटारमा प्रधानमन्त्री प्रचण्ड र एमाले अध्यक्ष ओलीबीच छलफल भइरहेको प्रधानमन्त्रीका प्रेस संयोजक सूर्यकिरण शर्माले बताए ।

प्रधानमन्त्री निवास बालुवाटारमा भएको भेटवार्तामा सरकार विस्तार, सरकारको नीति तथा कार्यक्रमलगायत विषयमा छलफल भएको हो । प्रमुख सत्ता साझेदार दलको बिहीबार बसेको बैठकले सरकारको न्यूनतम कार्यक्रम तय गर्न एमाले अध्यक्ष ओलीको संयोजत्कवमा एक कार्यदल गठन गरेको थियो ।

कार्यदलले पाँच दिनभित्र सरकारको न्यूनतम नीति तथा कार्यक्रम बनाउने तयारी गरेको छ । प्रचण्ड नेतृत्वको सरकार गठन भएपछि निरन्तर छलफल हुँदै आएको छ । खुमलटारमा भएको वार्तामा शक्ति बाँडफाँट एवम् सरकार सञ्चालन सम्बन्धमा छलफल भएको थियो । त्यसपछि सत्ता साझेदार दलका मुख्य नेताहरुबीच बालुवाटारमा छलफल भएको थियो ।