- ३१ असार २०८३, बुधबार / Jul 15, 2026
काठमाडौं । पूर्वी जेरुसेलमको अल अक्सा मस्जिदमा छापा मार्दा कम्तिमा १ सय ५८ जना प्यालेस्टाइनी घाइते भएका छन् ।
इजरायली सेनाले कब्जा गरेको सो मस्जिदबाट सयौंको संख्यामा प्यालेस्टाइनीलाई नियन्त्रणमा लिएको अधिकारीहरुले जनाएका छन् ।
बिहानको प्रार्थनाका लागि मस्जिदमा भेला भएको बेला सेनाले छापा मारेको अन्तर्राष्ट्रिय सञ्चार माध्यमले जनाएका छन् । सुरक्षाकर्मी पुगेलगत्तै मस्जिदमा रहेका प्यालेस्टाइनीहरुले ढुंगामुडा गरेको सेनाको दावी छ ।
स्थितिलाई नियन्त्रणमा लिन सुरक्षाकर्मीले अश्रु ग्यास र ग्रेनेड प्रहार गरेको छ । सो मस्जिदमा एक वर्षयताको सबै भन्दा ठूलो आक्रमण हो ।
अल अक्सामा सुरक्षाकर्मीको उपस्थितिलाई प्यालेस्टाइनीहरुले उत्तेजकको रुपमा हेर्दा बेला बेलामा झडप हुने गरेको छ । इजरायली प्रहरीले घटनास्थलबाट तीन सय भन्दा बढी प्यालेस्टाइनीलाई पक्राउ गरेको दावी गरेको छ ।
तर प्रदर्शनकारीले चार सयको हाराहारीमा पक्राउ परेको दावी गरेका छन् । मस्जिदमा आक्रमण भएलगत्तै त्यसको नियन्त्रणका लागि आफूहरुले बल प्रयोग गरेको प्रतिक्रिया प्रहरीले दिएका छन् ।
सो मस्जिदमा करिब ६० हजार मानिस प्रार्थनाका लागि भेला भएका थिए ।
