- २९ भाद्र २०८३, सोमबार / Sep 14, 2026
काठमाण्डौ । प्रधानमन्त्री कप एक दिवसीय क्रिकेटमा आज दुई खेल हुँदैछन् । समूह ‘ए’ का त्रिभुवन आर्मी क्लब र कर्णाली प्रदेश तथा समूह ‘बी’ मा रहेका नेपाल पुलिस क्लब र मधेस प्रदेशबीच खेल हुनेछ । आर्मी र कर्णालीको खेल मूलपानी मैदानमा तथा पुलिस र मधेस प्रदेशको खेल कीर्तिपुर मैदानमा बिहान साढे ९ बजेदेखि सुरु हुने बताइएको छ ।
समूह ‘ए’ बाट एपिएफ ४ खेलमा ७ अङ्कका साथ सेमिफाइनलमा पुगेको छ । यो समूहमा गण्डकी ४ खेलमा ५ अङ्कका साथ दोस्रो स्थानमा छ । आर्मी ३ खेलमा ४ अङ्कका साथ तेस्रो स्थानमा छ भने आज आर्मीले कर्णालीलाई हराउन सके सेमिफाइनलमा पुग्नेछ । हारेमा गण्डकी प्रदेश सेमिफाइनलमा पुग्नेछ ।
समूह ‘बी’ मा नेपाल पुलिस क्लब ३ खेलमा ६ अङ्कका साथ शीर्ष स्थान उक्लिएको छ । पुलिस एक खेल अगावै सेमिफाइनलमा पुगेको छ । आजको खेलले समूह विजेता र उपविजेता निर्धारण गर्नेछ । मधेस ३ खेलमा ५ अङ्कका साथ दोस्रो स्थानमा छ भने उ पहिलो पटक सेमिफाइनलमा पुगेको हो ।
