- ३ भाद्र २०८३, बुधबार / Aug 19, 2026
काठमाडौं । आठौं सगरमाथा सिमेन्ट प्रधानमन्त्री कप महिला भलिबल प्रतियोगिता बिहीबारदेखि सुरु हुँदै छ । प्रतियोगिताको सम्पूर्ण तयारी पूरा भएको पीएम कपका संस्थापक अध्यक्ष टीएस ठकुरीले बताए ।
प्रतियोगिता चैत १४ सम्म नेपालगन्ज रंगशालास्थित कभर्डहलमा चल्ने उनले जानकारी दिए । विगत भन्दा यसपालि कोरोना महामारीका कारण केही समय ढिला हुन गएको उनको भनाइ छ ।
सर्वाधिक धनराशि पुरस्कार रहेको प्रतियोगिता विजेताले ५ लाख, उपविजेताले २ लाख ५० हजार, तेस्रो हुनेले एक लाख र चौथो हुनेले ५० हजार रुपैयाँ प्राप्त गर्नेछन् । प्रधानमन्त्री कप भलिबललाई नेपालगन्जको पहिचानको रूपमा विकसित गर्ने मूल आयोजक समिति संयोजक कृष्णा केसीको भनाइ छ ।
प्रतियोगितामा आयोजकसहित नेपालका शीर्ष चार र भारतका दुई टिमको सहभागिता रहनेछ । लिगकम नकआउटका आधारमा हुने प्रतियोगितामा नेपाल पुलिस क्लब, त्रिभुवन आर्मी क्लब, न्यु डायमन्ड एकेडेमी, आयोजक लुम्बिनी युनाइटेड, भारतको छत्तीसगढ स्पोर्ट्स एकेडेमी (महाराष्ट्र) र हरियाणा स्पोर्ट्स क्लब भिड्ने छन् ।
