- २४ कार्तिक २०८३, मंगलवार / Nov 10, 2026
अमेरिकी विलासी पानीजहाज ‘द ओडिसी’ सिङ्गापुरमा नियन्त्रणमा ।
कम्पनीसँग पैसा सकिएपछि विश्व भ्रमण रोकिएको ।
गत महिना कम्बोडियामा झन्डै २०० यात्रु अलपत्र परेका ।
जहाजले साढे तीन वर्षमा १५० देश घुम्ने लक्ष्य राखेको थियो ।
अदालतको आदेशपछि जहाज नियन्त्रणमा, चालक दल सुरक्षित ।
एजेन्सी । विश्व भ्रमणमा निस्किएको अमेरिकी विलासी पानीजहाज ‘द ओडिसी’ लाई सिङ्गापुरमा नियन्त्रणमा लिइएको छ । जहाज सञ्चालन गर्ने कम्पनी आर्थिक संकटमा परेपछि गत महिना कम्बोडियामा झन्डै २०० यात्रु अलपत्र परेका थिए ।
सन् २०२४ अक्टोबरमा उत्तरी आयरल्यान्डको राजधानी बेलफास्टबाट यात्रा सुरु गरेको उक्त पानीजहाजले साढे तीन वर्षमा १५० देश भ्रमण गर्ने लक्ष्य राखेको थियो । तर इन्धनको मूल्य अत्यधिक बढेको कारण देखाउँदै जहाजको स्वामित्व रहेको कम्पनी ‘भिल्ला भि रेसिडेन्सेस’ ले भ्रमण स्थगित गरेको थियो ।
यात्रा रोकिएपछि कम्बोडियामा झन्डै २०० यात्रुलाई जहाजबाट ओर्लन बाध्य पारिएको थियो । त्यसपछि जहाज सिङ्गापुर पुगेको हो । स्थानीय अधिकारीहरूका अनुसार अहिले यो सिङ्गापुरको बन्दरगाहमा रोकिएको छ ।
सिङ्गापुर पोर्ट अथोरिटीका अनुसार जहाजका चालक दलका सदस्यहरू सुरक्षित छन् । उनीहरूको बसोबास र हेरचाहको व्यवस्था जहाजका ऋणदाताहरूले गरिरहेका छन् ।
अदालतको आदेशअनुसार जहाज नियन्त्रणमा लिइएको बीबीसीले जनाएको छ । जफतसम्बन्धी प्रक्रियाको रेखदेख गर्न सिङ्गापुरस्थित कानुनी संस्था ‘हेल्म्सम्यान एलएलसी’ नियुक्त गरिएको छ । यद्यपि उक्त संस्थाले कुन पक्षको प्रतिनिधित्व गरिरहेको छ भन्ने स्पष्ट भइसकेको छैन ।
