बचतकर्ताको रकम जोखिममा

रुपन्देही । यहाँका सहकारी संस्था सङ्कटमा परेको पाइएको छ । बुटवल स्थित शिवशिखर, सुप्रिम र आगन्तुक सहकारीका बचतकर्ताले रकम निकाल्न नपाएको गुनासो सार्वजनिक भएपछि सहकारीहरू सङ्कटमा रहेको पाइएको हो ।

प्रदेशमा सञ्चालनमा भएका केही सहकारी संस्थामा समस्या देखिएकाले सरकारले कानुनी प्रक्रिया अगाडि बढाएको प्रदेश सहकारी विकास बोर्डको उपाध्याक्ष टीकाराम पोखरेलले बताए ।

सहकारीको मर्मभन्दा बाहिर बचतकर्ताको रकममा सञ्चालकले चलखेल गर्दा यस्तो समस्या देखिएको उनको धारणा छ ।

बर्दियाको नमस्ते बहुउद्देश्यीय सहकारी संस्थाले आफूखुसी लगानी गर्दा समस्या आएको उदाहरण दिँदै सहकारीमा देखिएको समस्यालाई तीन तहका सरकारको सक्रियताले मात्र समाधान गर्न सकिने बताए ।

सहकारीमा सुशासन नभएको बताउँदै रुपन्देहीका ५० भन्दा धेरै सहकारीमा पुगेर सुधार गर्न निर्देशन दिएको लुम्बिनी प्रदेश सहकारी रजिस्ट्रार भीमप्रसाद तिवारीले बताए ।

सहकारी संस्थाले सहकारीको मूल्य र मान्यता पालना नगरेको, गलत लेखापरीक्षण गरी संस्था चलाएको जस्ता कारणले पछिल्लो समय सहकारीमा समस्या देखिएको तिवारीको जिकिर छ ।