बाघको छालासहित चार जना पक्राउ

दाङ । प्रहरीले लमही नगरपालिका टिकुलीगढबाट बाघको छालासहित चार जनालाई पक्राउ गरेको छ । बाघको छालासहित चारजनालाई पक्राउ गरेको लमहीका प्रहरी निरीक्षक राजन पौडेलले जानकारी दिए।

छाला बिक्री गर्न लागेको अवस्थामा पक्राउ गरिएको प्रहरी निरीक्षक पौडेलको भनाइ छ । बरामद गरिएको बाघको छालासहित उनीहरूलाई डिभिजन वन कार्यालय देउखुरीलाई बुझाइएको छ ।

पक्राउ पर्नेमा घोराही उपमहानगरपालिकाका शंकर गिरी, उनकी श्रीमती झरना थापा, लमही नगरपालिका नर्तिका गिरबहादुर बिश्वकर्मा र लमही नगरपालिका बरुवा गाउँका आशाकुमार चौधरी रहेका छन् । उनीहरुको थप अनुसन्धान भइरहेको प्रहरीले जनाएको छ ।