मलका लागि आन्दोलन गर्ने किसानको तयारी

काठमाडौं । मकै र धान खेती गर्ने समय आइसक्दा पनि किसानले समयमै रसायनिक मल अभाव भएको भन्दै आन्दोलन गर्ने चेतावनी दिएका छन् । सरकारले समयमै मल उपलब्ध नगराए सिंहदरबारमा धर्ना दिने बताएका छन् ।

यसैबीच अखिल नेपाल किसान महासंघ क्रान्तिकारी केन्द्रले कृषि सामग्री कम्पनी धुलिखेल शाखामार्फत वाग्मती प्रदेशको कृषि तथा पशुपन्छी विकास मन्त्रालयलाई १० हजार टन युरिया र ५ हजार टन डीएपी मल उपलब्ध गराउन माग गरेको छ ।

मल, बीउबिजन लगायतका आधारभूत वस्तु उपलब्ध नहुँदा कृषकहरू मारमा परेको भन्दै ज्ञापन पत्र बुझाएको हो । रसायनिक मलको समस्या तत्काल समाधान नभए आन्दोलनमा जान बाध्य हुने उनीहरूले चेतावनी दिएका छन् ।

मलको कारोबार गर्दै आएको कृषि सामग्री कम्पनी लिमिटेडको धुलिखेलस्थित गोदाम र साल्ट ट्रेडिङ कर्पोरेसन बनेपास्थित गोदाम खाली छ । भागबन्डा गरिएका १०–१५ वटा सहकारीले लान बाँकी रहेका करिब १६ सय बोरा मलबाहेक अरू मल मौज्दात नभएको कृषि सामग्रीका धुलिखेल शाखा प्रमुख वासुदेव शर्माले बताए ।

वैशाखमा २ पटक गरेर आएको मलमध्ये काभ्रे, दोलखा, रामेछाप र सिन्धुपाल्चोकका ४ सय सहकारीमार्फत बिक्री गरिएको शर्माले बताए ।