- २८ भाद्र २०८३, आईतवार / Sep 13, 2026
मुगुका खाद्यान्न गोदाम खाली ।
तत्काल ६ हजार क्विन्टल खाद्यान्न माग ।
विपतमा मात्रै वितरण गर्ने गरी ५ सय क्विन्टल खाद्यान्न मौज्दात ।
मुगु । कर्णाली प्रदेशको मुगुममा रहेका खाद्यान्न गोदाम तथा डिपोहरु खाली भएका छन् । जिल्लामा रहेका खाद्यान्न तथा व्यापार कम्पनी शाखाको गोदाम र डिपोहरुमा खाद्यान्न मौज्दात खाली भएको हो । खाद्यान्न मौजात नभएपछि मुगु जिल्लामा तत्काल ६ हजार क्विन्टल खाद्यान्न माग गरिएको छ । छायानाथ–रारा नगरपालिकामा मात्रै २ हजार क्विन्टलको माग गरिएको छ ।
जिल्लाको सोरुमा १ हजार ५ सय, खत्याडमा १ हजार ५ सय र मुगुमकार्मारोङ गाउँपालिकामा १ हजार क्विन्टल खाद्यान्न तत्काल उपलब्ध गराउन जिल्ला खाद्य सुरक्षा समितिको बैठकले हवाईमार्ग अथवा सडक मार्गबाट भए पनि उपलब्ध गराउन माग गरेको प्रमुख जिल्ला अधिकारी कृष्णकुमार निरौलाले बताए ।
वर्षमा ढुवानी गरेको सबै चामल बिक्री भइसकेको खाद्य व्यवस्था तथा व्यापार कम्पनी लिमिटेड शाखा मुगुले जनाएको छ । गत आर्थिक वर्षको खाद्यान्न सकिएको र यो आर्थिक वर्षको खाद्यान्न ढुवानी गर्ने प्रक्रियाअनुसार ठेक्का प्रक्रियामा रहेको जनाइएको छ । गमगढी बजारमा रहेको कम्पनीको शाखा कार्यालयमा रहेको गोदाममा ५ सय क्विन्टल खाद्यान्न मौज्दात रहेको र उक्त खाद्यान्न दैवी प्रकोप, आपत्विपत् परेपछि मात्र वितरण गर्ने गरी साउन महिनाको २८ गतेबाट सर्वसाधारणका लागि खाद्यान्न वितरणमा सूचना जारी गर्दै बन्द गरिएको थियो ।
वर्षाका कारण कर्णाली राजमार्ग ठाउँ ठाउँमा अवरुद्ध भएकाले हवाई मार्गबाट खाद्यान्न ढुवानी गर्नुको विकल्प छैन । छिटोभन्दा छिटो खाद्यान्न ढुवानीको व्यवस्था गरिदिन सरोकारवाला निकाय, प्रदेश सरकारलगायत सम्बन्धीत नीकायहरुमा जानकारी गरिसकेको प्रजिअ निरौलाको भनाई छ ।
