राप्ती स्वास्थ्य विज्ञान प्रतिष्ठानमा सुत्केरीको ज्यान गएपछि तनाव सिर्जना

दाङ । सुत्केरीको ज्यान गएपछि दाङको राप्ती स्वास्थ्य विज्ञान प्रतिष्ठानमा तनाव उत्पन्न भएको छ । दाङको घोराहीमा रहेको राप्ती स्वास्थ्य विज्ञान प्रतिष्ठानमा सुत्केरीको ज्यान गएपछि तनाव सिर्जना भएको हो । सामान्यरूपमा सुत्केरी भएको र बच्चाको सालनाल ननिस्केको भन्दै उपचारमा खटिएका नर्सहरूले हात हालेर जबरजस्ती सालनाल निकाल्न खोज्दा सुत्केरीको ज्यान गएको मृतकका आफन्तको आरोप रहेको छ ।

घोराही उपमहानगरपालिका ८ सौरीकी मधु बुढाथोकी केसीको विहीबार अस्पतालमा ज्यान गएपछि आफन्तले शुक्रवार आन्दोलन गरेका छन् । मृतकको क्षतिपूर्तिबापत ५० लाख रुपैयाँ, शिशुको उपचार र पठनपाठनको सबै खर्च प्रतिष्ठानले बेहोर्नुपर्ने, मृतकको शरीरको सबै अङ्गको परीक्षण हुनुपर्ने उनीहरूले माग गरिरहेका छन् । मृतकका आफन्तले घटनाको छानबिन तथा क्षतिपूर्तिको माग गर्दै आन्दोलन गरिरहेका छन् ।