- ३१ असार २०८३, बुधबार / Jul 15, 2026
काठमाडौं । निर्वाचनको नतिजा सार्वजनिक भएसँगै सरकार निर्माण र पदिय बाँडफाँडको रणनीतिमा दलहरु लागिपरेका छन् ।
एक दललाई बहुमत प्राप्त हुन नसकेसँगै दुईभन्दा बढी दल मिलेर मात्रै सरकार निर्माण गर्ने अवस्था भएकोले राष्ट्रपति, उपराष्ट्रपति, सभामुख लगायतका पदहरुमा पार्टीले दावी गरिरहेका छन् ।
कतिपयले गैर दलीय क्षेत्रबाट राष्ट्रपति बनाउँदा पुर्व प्रधानन्यायाधीश खिलराज रेग्मी, कल्याण श्रेष्ठ र शुशीला कार्कीमध्येबाट कुनै एकलाई राष्ट्रपति बनाउनुपर्ने लविङ समेत गरिरहेका छन् ।
तर संविधानले यी तीनै जनालाई राष्ट्रपति बन्न निषेध गरेको छ । निर्वाचनबाट सबैभन्दा ठुलो दल बनेको नेपाली कांग्रेसबाट राष्ट्रपतिका लागी वरिष्ठ नेता रामचन्द्र पौडेल, पूर्वमन्त्री कृष्ण सिटौला, गोपालमान श्रेष्ठ प्रमुख दावेदारका रुपमा रहेका छन् ।
एमाले मौन रहेकाले दावी देखिएको छैन । नेकपा माओवादी केन्द्रबाट उपराष्ट्रपति नन्दबहादुर पून, पूर्वसभामुख अग्नि सापकोटा, उपाध्यक्ष कृष्ण बहादुर महरा र जयपुरी घर्तिको दावी रहेको स्रोतको दावी छ ।
प्रत्यक्षमा १० सिट जितेर पनि राष्ट्रिय पार्टी बन्न नसकेको एकिकृत समाजवादी झलनाथ खनाल र माधव नेपाल पनि दावेदार रहेको स्रोतले बताएको छ ।
तर कुनै एक दलले चाहेअनुसार राष्ट्रपति, उपराष्ट्रपति र सभामुख तथा प्रधानमन्त्री बन्ने अवस्था भने छैन ।
