- ५ कार्तिक २०८३, बिहीबार / Oct 22, 2026
काठमाडौं । पोखरामा भएको विमान दुर्घटनाका कारण २५ औं राष्ट्रिय भूकम्प सुरक्षा दिवसका सम्पूर्ण कार्यक्रमहरु स्थगित भएका छन् । आइतबार पोखरामा भएको यति एयरलाइन्सको विमान दुर्घटनाका कारण हरेक वर्ष माघ २ गते मनाइने राष्ट्रिय भूकम्प सुरक्षा दिवस सरकारले यस पटकका लागि स्थगित गरेको हो ।
१९९० साल माघ २ गते दिउँसो २ बजेर २४ मिनेटमा गएको महाभूकम्पलाई स्मरण गर्दै हरेक वर्ष भूकम्प सुरक्षा दिवस मनाउने गरिएको छ । यसवर्ष पनि २५ औं राष्ट्रिय भूकम्प सुरक्षा दिवस सरकारी स्तरमै मनाउने तयारी भइरहेको अवस्थामा सरकारले राष्ट्रिय शोक घोषणा गरेका कारण कार्यक्रम स्थगित भएका हुन ।
सरकारले सोमबार राष्ट्रिय शोक घोषणा गर्दै सार्वजनिक बिदा दिने निर्णय गरेकाले कुनै पनि औपचारिक कार्यक्रमहरु नुहने भएको हो । भविष्यमा आउन सक्ने भूकम्पका बारेमा जनचेतना जगाउने उद्देश्यले सरकारले यो दिवस मनाउन सुरु गरेको थियो ।
सोमबार स्थगित गरिएका कार्यक्रम एक हप्ताभित्र गरिने जनाइएको छ । भूकम्प सुरक्षित पूर्वाधार, सुरक्षित जीवनको आधार’ नाराका साथ दिवस मनाउने तयारी थियो । २०५५ सालदेखि माघ २ गतेलाई राष्ट्रिय भूकम्प सुरक्षा दिवसका रुपमा मनाउन थालिएको हो ।
