लम्पी स्किन विरुद्ध १० लाख ३७ हजार डोज खोप आयात

काठमाण्डौ । लम्पी स्किन विरुद्ध १० लाख ३७ हजार डोज खोप आयात भएको छ । पशुचौपायामा फैलिएको लम्पी स्किन रोग रोकथामका लागि १० लाख ३७ हजार डोज खोप आयात भएको हो ।

गाईभैँसीको खोपका लागि ०७९ र ८० मा खर्च गर्ने गरी महानगरपालिका र सङ्क्रमण नफैलिएका जिल्लाबाहेक हरेक पालिकामा महामारी नियन्त्रण गर्न सङ्घीय सःसर्त अनुदानअन्तर्गत १ लाख रुपैयाँका दरले रकम विनियोजन गरिएको र यो रकमबाट उपचार तथा खोप खरिद गर्न सबै पालिकालाई आग्रह गरिएको छ ।

अहिलेसम्मआयातित खोपमध्ये २ लाख २२ हजार ७ सय ५१ पशुलाई लगाइएको पशु सेवा विभागले जनाएको छ । रोगको महामारी नियन्त्रण गर्नका लागि सरकारले निजी क्षेत्रलाई खोप आयातको स्वीकृति दिएको कृषि तथा पशुपक्षी विकास मन्त्रालयले जनाएको छ ।

विभिन्न ६ बुँदे मागसहित पशु सेवा विभाग परिसरमा किसानले धर्ना समेत दिएका थिए । लम्पी स्किन गाईभैँसीमा लाग्ने महामारी रोग हो । यो रोग लागेका पशुमा उच्च ज्वरो आउने, दाना पानी कम खाने, दूध उत्पादन घट्ने, छालामा गोलो गिर्खा र गाँठाहरू देखिन्छ ।