शरीरमा आगो लगाएकी महिलाको मृत्यु

विराटनगर । आफ्नै शरीरमा आगो लगाएकी महानगरपालिका–१० तीनटोलियाकी एक महिलाको उपचारका क्रममा मृत्यु भएको छ । कुपीबाट मट्टितेल खन्याएर शरीरमा आगो लगाएकी ४० वर्षीया आशा शर्मा (कोइरी)को मृत्यु भएको मोरङ प्रहरीका प्रवक्ता डीएसपी रन्जनकुमार दाहालले बताए ।

पति राजकुमार कोइरीसँग भएको सामान्य विवादपछि गत बुधबार राति ९ बजेतिर आशाले मट्टितेल खन्याएर शरीरमा आफैँले आगो लगाएको प्रारम्भिक अनुसन्धानबाट खुलेको छ । शरीरका अधिकांश भाग जलेकी उनलाई उपचारका लागि कोसी अस्पताल ल्याइएको थियो ।

बिहीबार साँझ उनको मृत्यु भएको प्रहरीले जनाएको छ । राजकुमार र आशाबीचको पारिवारिक विवादका बारेमा प्रहरीले खुलाएको छैन । आशाको मृत्यु भएपछि पति राजकुमारलाई नियन्त्रणमा लिएर प्रहरीले घटनाको अनुसन्धान सुरु गरेको छ । शव पोस्टमार्टमका लागि कोसी अस्पतालमै राखिएको बताइएको छ ।