शिक्षकले तलबभत्ता नपाएपछि धनुषाका सबै विद्यालय बन्द

ढल्केबर। शिक्षकसँग आवद्ध विभिन्न संघ संस्थाहरुले धनुषाका सामुदायिक विद्यालय बन्द गराएका छन् । नगराइन नगरपालिकाका शिक्षकहरुले तलबभत्ता माग गर्दै गरेको आन्दोलनलाई समर्थन जनाउँदै सबै सामुदायिक विद्यालय बन्द गराएका हुन् ।

नगराइन नगरपालिकाका शिक्षकको आन्दोलनमा ऐक्यबद्धता जनाउँदै शुक्रबार जिल्लाका सबै सामुदायिक विद्यालयको पठनपाठन बन्दको गरिएको नेपाल शिक्षक सङ्घ धनुषाका अध्यक्ष रामसिनेही यादवले बताए ।

नगराइन नगरपालिकाका शिक्षक विगत पाँच महिनादेखि तलबभत्ता नपाएपछि मङ्सिर १८ गतेदेखि आन्दोलनरत रहेको जानकारी दिए ।

लामो समयदेखि नगरपालिकाको कार्यालय अगाडि शिक्षकहरुले धर्ना दिएर आन्दोलन गरिरहे पनि हालसम्म स्थानीय तहले तलबभत्ता उपलब्ध गराउने कुनै ठोस पहल नगरेका हुदा दबाब दिने उद्देश्यले यस्तो गरिएको अध्यक्ष यादवले बताए ।