२२ जना आरोही धौलागिरि शिखरमा पुगे

काठमाण्डौ । आठ हजार एक सय ६७ मिटर अग्लो हिमाल धौलागिरि यस वर्षको पहिलो आरोहण भएको छ । सन् २०२२ को आरोहण धौलागिरि हिमाल सफलतापूर्वक आरोहण गरेर यस वर्षको आरोहण सुरु भएको पर्यटन विभागले जनाएको छ । वसन्त ऋतुको मौसममा १८ वटा हिमाल आरोहणका लागि ६१ वटा समूहबाट पाँच सय पाँच जनाले अनुमति लिएको र सबैभन्दा धेरै सगरमाथा आरोहणका लागि दुई सय चार जनाले अनुमति लिएको विभागले जनाएको छ ।
अहिलेसम्म १० जना आरोही र १२ जना आरोहण सहयोगी गरी २२ जना शिखरमा पुगेका विभागबाट खटाइएका सम्पर्क अधिकृत नगेन्द्र रोकाले जानकारी दिनुभयो । यस वर्ष धौलागिरि हिमाल आरोहणका लागि दुई समूहबाट २१ जनाले अनुमति लिएका छन् ।

हालसम्म १० जना आरोही र १२ जना आरोहण सहयोगी गरी २२ जना धौलागिरिको शिखरमा पुगेको र धौलागिरि हिमाल आरोहणका लागि दुई समूहबाट २१ जनाले अनुमति लिएको विभागले जनाएको छ । अनमुति लिएकामध्ये धेरैजसो आरोहीहरू हिमालका आधार शिविरतर्फ गइसकेका छन् । विभागले आरोहण रोयल्टी शुल्कबापत २९ करोड ७४ लाख ३४ हजार आठ सय एक रुपियाँ राजस्व सङ्कलन समेत गरिसकेको छ ।