सडक क्षतिग्रस्त बनेपछि विरामी मर्कामा

सिन्धुपाल्चोक । नेपाल–चीन तातोपानी नाका जोड्ने कोदारी लोकमार्गको तातोपानी नाका जोड्ने सडक क्षतिग्रस्त बनेको छ । उक्त सडक खण्डको माथिबाट आएको बाढी र भेलले सडक क्षतिग्रस्त बनेको हो । सिन्धुपाल्चोक जिल्लाको भोटेकोशी गाउँपालिका–२ घट्टेखोलाको भीषण बाढीका कारण तोपानी नाका जोड्ने सडक क्षतिग्रस्त बनेपछि आवतजावत बन्द भएको छ ।

सडक खुलाउन सडक डिभिजन कार्यालयले वास्ता नगरेकोले वडा कार्यालय र पालिकाको प्रयासमा खुलाउने कार्य जारी रहेको छ । बाढी र पहिरोका कारण सडक अवरुद्ध हुदाँ बाह्रबिसे र तातोपानी सडक सम्बन्ध टुटेको जनाइएको छ। सडकमाथिको मेराक भन्ने स्थानबाट आएको बाढीले सडक बगाएपछि यातायातका साधान पूर्णरुपमा रोकिएका र सडक बगाएपछि पैदल यात्रा समेत पूर्णरुपमा रोकिएको जनाइएको छ। बिरामी, सुत्केरीलाई अस्पताल पुर्याउन समस्या भएको स्थानीयको भनाई छ।