- २२ भाद्र २०८३, सोमबार / Sep 7, 2026
काठमाडौं । सरकारले १५ दिनभित्र अक्सिजन प्लान्ट जडान गर्नू भनी दिएको निर्देशन निजी अस्पतालले हावादारी निर्णय भएको बताएका छन् ।
अक्सिजन प्लान्टको मूल्य कम्तीमा २ करोड र त्यसका लागि पूर्वाधार तयार गर्न ५० लाख चाहिने भएकले तत्काल जडान गर्न नसक्ने भन्दै एक विज्ञप्ति जारी गरी एसोसिएसन अफ प्राइभेट हेल्थ इन्स्टिच्युसन अफ नेपाल (अफिन) का अध्यक्ष बसन्तकुमार चौधरीले बताए ।
सरकारले अक्सिजन व्यवस्थापनका लागि तत्काल प्रभावकारी कदम चाल्नुको सट्टा निजी अस्पतालहरूलाई १५ दिनभित्र अक्सिजन प्लान्ट जडान गर्नु भन्नु हावादारी निर्देशन दिएर आफ्नो दायित्वबाट सरकार पन्छिएको विज्ञप्तिमा उल्यख छ । खरिद सम्झौता गरेको साढे तीन महिना भन्दाअघि अक्सिजन प्लान्ट जडान गर्नै नसक्ने अध्यक्ष चौधरीले बताए ।
टप्प टिपेर जडान गर्ने उपकरण नभएको भन्दै प्लान्ट भित्रिएपछि सोको जड़ान गर्न कम्तीमा १५ दिन लाग्ने विज्ञप्तिमा भनिएको छ । देशभरि नै निषेधाज्ञा जारी रहेको र अन्तर्राष्ट्रिय हवाइसेवा पनि बन्द रहेका कारण द्रुत सामान ढुवानीको विकल्प नभएको समेत विज्ञप्तिमा उल्लेख गरिएको छ ।
