- २१ कार्तिक २०८३, शनिबार / Nov 7, 2026
काठमाण्डौ । असोज २० गतेसम्मको समय बञ्चरेडाँडा ल्यान्डफिल्ड साइट प्रभावित सरोकार समितिले दिएको छ । निर्णायक आन्दोलन गर्ने बताएको समितिले मागप्रति गम्भीर रहेको भन्दै सरकारबाट पत्र पाएकोले असोज २० गतेसम्म रचनात्मक विरोधका कार्यक्रम मात्रै गर्ने निर्णय गरेको हो ।
असोज १ गतेदेखि फोहोर बोकेका सबै गाडी रोकेर आन्दोलन गर्ने चेतावनी दिएको समितिले प्रधानमन्त्री तथा मन्त्रिपरिषद्को कार्यालय र सहरी विकास मन्त्रालयले स्थानीयवासीको मागप्रति सरकार गम्भीर रहेको भन्दै पत्र पठाएका कारण आन्दोलनको स्वरूप परिवर्तन गरेको समितिले जनाएको छ । समितिले गएको जेठ २३ गते काठमाण्डौ महानगरसँग गरेका सहमतिहरू तीन महिनाभित्रमा कार्यान्वयन गर्नुपर्ने माग गरेको छ ।
असोज २० गतेसम्म पनि माग पूरा नभएमा भने कुनै पनि आश्वासनलाई नमानी परिणाम नआएसम्म आन्दोलन गर्ने समितिले चेतावनी दिएको छ । समितिले सरकारसँग मानवबस्तीरहित ल्यान्डफिल्ड साइट विकास क्षेत्र, फोहरमैला प्रदूषणरहित बस्ती विकास क्षेत्र, प्रभावित क्षेत्रलाई विशेष संवेदनशील क्षेत्र निर्णय गरी कार्यान्वयन गर्नुपर्ने र फोहोर विकास प्राधिकरण गठन गर्नुपर्ने गरी चार बुँदे माग रहेको छ ।
