- २ श्रावण २०८३, शनिबार / Jul 18, 2026
विराटनगर। सरुवा भएर आएका कर्मचारीलाई हाजिर गर्न रोकेपछि मोरङको कानेपोखरी गाउँपालिका एक महिनादेखि प्रमुख प्रशासकीय अधिकृतविहीन भएको छ । संघीय मामिला तथा सामान्य प्रशासन मन्त्रालयले प्रमुख प्रशासकीय अधिकृतका रुपमा पठाएका शाखा अधिकृत विष्णुकुमार थेगुवालाई अध्यक्ष राजमती इङ्नामले हाजिर गर्न रोक लगाएकी हुन् ।
१३ चैतमा प्रमुख प्रशासकीय अधिकृत सन्तोष घिमिरेलाई कोशी प्रदेशको मुख्यमन्त्री तथा मन्त्रिपरिषद्को कार्यालयमा सरुवा गरेर उनको ठाउँमा मुख्यमन्त्री कार्यालय मातहत रहेका शाखा अधिकृत थेगुवालाई पठाएको थियो । घिमिरेको सरुवा रोक्न पालिका अध्यक्ष इङ्नामसहितको टोली सामान्य प्रशासन मन्त्रालय पुगेको थियो ।
तर मन्त्रालयबाट सकारात्मक जवाफ नपाएपछि अध्यक्ष इङ्नामले सरुवा भएर आएकालाई हाजिरमा रोक लगाएकी हुन् । अध्यक्ष इङ्नामले सामान्य प्रशासन मन्त्रालयलाई पत्र लेखी पूर्व जानकारीबिना कर्मचारी सरुवा गरेको भन्दै नयाँ कर्मचारीलाई हाजिर गराउन नसक्ने व्यहोराको पत्र पठाएकी थिइन् ।
आर्थिक वर्षको संवेदनशील क्षणमा प्रमुख प्रशासकीय अधिकृतको सरुवा हुँदा विकास खर्चको लक्ष्यमा असर गर्ने पत्रमा उल्लेख छ ।
