सलह खाएका घटनामा नेपाली विज्ञले दिए दाेधारे सुझाव

२० असार २०७७ काठमाडौं । महामारीकै बेला अर्को महामारीको रुपमा देखिएको सलह किराको आतङ्कले त्रसित बनाएको छ । नेपालमा सलहको आतङ्क थपिदै गएको छ । तर सलहलाई नै छोपेर फराइ गरी खाने नेपाली पनि दाङमा भेटिएका छन् ।

कोरोनाले भाइरसको महामारीले मानिसको ज्यान लिइरहेको छ भने सलह किरालाई मिठो मानेर खाइरहेको दृश्यले विज्ञको ध्यान केन्द्रित बनेको छ । सलहलाई भुटेर, उसिनेर, साँधेर अनि झोलसहित खाएका दृश्य सामाजिक संजालमा धेरै आएकाले यो खानु हुन्छ कि हुदैन भन्ने दुविधाका बीच विज्ञले दुईथरी धारणा राखेका छन् । कतिपयले खान हुन्छ भनेका छन् भने कतिपयले खान हुदैन भनेका छन् ।

त्रिभुवन विश्वविद्यालयका कीटविज्ञले भने सलहमा उच्च प्रोटिन हुने भएकाले खानु हुने बताएका छन् । नेपालको परम्परागत समाजमा यस्ता कीरा खाने चलन रहेको भन्दै डा. प्रेमबहादुर बुढाले उड्ने कीरा भएकाले विषादीको असर नरहने दाबी गरेका छन् । नेपालमा आएको सलह तेस्रो जेनेरेसनको भएको भन्दै उनले भाइरसजन्य सङ्क्रमणको सम्भावना न्यून रहेको बताए । तर कतिपय विज्ञले भने मानिसले खान नहुने तर कुखुरा र हाँसका लागि दानाका रूपमा प्रयोग गर्न सकिने बताएका छन् ।

सलह खाएर अन्भव बटुलेकाहरू यस्तो भन्छन्…

तीन दिन देखि सलह खान लागेको छु । लगातार चार छाक खाएको छु । कुनै अफ्ठेरो महशुस गरेको छैन । खाएको केही समय पेट अरिलो हुन्छ । टन्न अघाएको महशुस गराउँछ । धेरैले यसको स्वादका बारेमा जिज्ञासा राख्नुभएको छ । यस्तै हुन्छ भन्न सकिँदैन । धाने फट्याँग्रा खाएकालाई त्यति तिख्खर लाग्दैन ।

नेपालमा प्रवेश गरेको दिन देखिनै स्वास्थ्य क्षेत्रका विज्ञहरुले सलहमा अत्याधिक प्रोटिन र कार्वोहाइडेड पाइन्छ भन्नुभयो । मान्छेले खाँदा स्वास्थ्यका लागि राम्रो हुन्छ भन्ने उहाँहरुको भनाईले मलाई निकै उर्जा दियो । आयो भने जसरी पनि खान्छु भन्ने मानसिकता बनाएँ । मलाई जात धर्मका कारणले कुनैपनि मासु खान अहिलेसम्म रोकेको छैन ।

नभन्दै आफ्नै घर क्षेत्रका बारीमा आएर सलह बसेको रहेछ । मैले खाने हो भनेपछि घरमा छोपेर राखेछन । अफिसबाट फर्किदै गर्दा बाटोमा कसकसको घरमा छ भनेर खोज्दै गएँ । साली विमलाको घरमा पाकेको रहेछ । त्यही खाएँ । अनि घरमा गएको भर्खरै पखेटा केलाउँदै रहेछन ।

त्यतिबेर पनि पर्खिन सकिन, कपडा बदलेर फेरि सालीकै घरमा पुगेर धेरै वटा सलह कपाकप खाएँ । कुनै खास स्वाद नभएर पनि हुन सक्छ धेरैवटा खाँदा पनि धित मरेन । त्यसपछि नजिकै छिमेकी सुशीलाको घरमा गएँ । त्यहाँ पनि भर्खर फ्राई गरेर उतारेको फेला पारेँ । खानुस भन्नुभयो । फोटो खिच्दै खाएँ । त्यहाँ खाने अलि धेरैजना थियौ । केहीले खान डर मानेका थिए ।