- ८ भाद्र २०८३, सोमबार / Aug 24, 2026
सुर्खेत । जुम्लाको गाग्रा लेकको हिउँमा फसेका ५५ जनालाई उद्धार गर्न हेलिकप्टर पाटन तर्फ उडेको छ । भारी हिमपातका कारण उनीहरू लेकको विभिन्न ठाउँमा फसेका हुन् ।
भोकबाट बचाउन तत्काल उनीहरूलाई खानेकुरा खसाल्ने गरी सानो हेलिकप्टर सुर्खेतबाट उडेको नन्द वक्स गण जुम्लाका गणपति रविन थापाले बताए । चिउरा, दालमोठ, चाउचाउ जस्ता खानेकुरा लिएर हेलिकप्टरमा गएको हो ।
तातोपानी गाउँपालिका ८ जुम्लाको टोप्ला गाउँबाट एक दिनको दुरीमा रहेको गाग्रा, एडीओडार, खोटीसल्ला र ध्वनि ठाउँमा गरी ५५ जना हिउँमा फसेका हुन् । उनीहरू सेतक चिनी कोर्न पाटन गएका थिए ।
तातोपानी गाउँपालिका र प्रदेश सरकारसँग समन्वय गरेर हिउँमा फसेका व्यक्तिहरूको उद्धार गर्न लागिएको जुम्लाका प्रमुख जिल्ला अधिकारी विजया प्रसाईंले बताए ।
हिउँको चिसोले कठ्याङ्ग्रिएर तातोपानी ८ की देवी शाही र तातोपानी ७ बाह्रगाउँका मुनबहादुर रावतको ज्यान गएको प्रहरी कार्यालय जुम्लाले जनाएको छ ।
