अझै सकिएन मनोनयन प्रक्रिया

पोखरा । यहाँ अझै मनोनयन प्रक्रिया सकिएको छैन । आयोगले व्यवस्थापन गर्न नसक्दा उम्मेद्वार मात्र होइन कर्मचारीसमेत समस्यामा परेका छन् ।

रातभर लगाएर मनोनयनको बाँकी काम गरिरहेको कर्मचारीले बताएका छन् । अझै केही घण्टा लाग्ने मुख्य निर्वाचन अधिकृत श्रीकृष्ण भट्टराईले जानकारी दिए ।

व्यक्तिगत ल्यापटपबाट काम गरिरहेको कर्मचारीले बताए । जेनरेटर नहुँदा केही समय कामै रोकिएको उनीहरुको भनाइ छ । आयोगले तोकेको भन्दा बढी कर्मचारी राख्न नपाएका कारण पनि समस्या भइरहेको भट्टराईले सुनाए ।

पोखराको मेयरका लागि २५ र उपमेयरका लागि ९ जनाले उम्मेद्वारी दर्ता गराएका छन् । गण्डकी प्रदेशभरि हालसम्म १२ हजार एक सय ४६ जनाले मनोनयन दर्ता गराइसकेका छन् ।

तथ्यांक बाँकी भएकाले बढ्न सक्ने छ । आयोगले दुई दिन मनोनयनको समय तोके पनि सबैजसो दलहरू भोलिपल्ट अन्तिम समयमा मात्रै पुगेका थिए ।