- १ भाद्र २०८३, सोमबार / Aug 17, 2026
काठमाडौं । नेपाल रेडक्रस सोसाइटीको विधान अधिवेशन स्थगित भएको छ । थापाथलीस्थित कार्की ब्यांक्वेटमा आइतबार सोसाइटको अधिवेशन सुरु गरिएको थियो ।
असन्तुष्ट पक्षको अवरोधपछि अधिवेशनस्थलमा तोडफोड गरेपछि अधिवेशन स्थगित भएको हो । केन्द्रीय सदस्य मोहन पोखरेल, सुबोध सिंह, उमेश थापा, श्याम लुइँटेलको नेतृत्वमा आएका असन्तुष्ट पक्षले अधिवेशनको ब्यानर तथा कुर्सी तोडफोड गरेको सोसाइटीका उपकोषाध्यक्ष होम पाठकले बताए ।
हलमा हातपातकै स्थिति हुन थालेपछि अधिवेशन स्थगित गरिएको पाठकको भनाइ छ । सोसाइटीको केन्द्रीय कार्य समितिले विधानविपरीत मातहतका १६ जिल्ला कार्य समिति शाखा विघटन गरेपछि विरोधमा उत्रिनुपरेको असन्तुष्ट पक्षका मनोज थापाले बताए ।
केन्द्रीय कार्य समितिले कार्यावधि पुगेको भन्दै शनिबार मातहतका १६ जिल्ला कार्य समिति विघटन गरी तदर्थ समिति गठन गरेको थियो ।
