- १० आश्विन २०८३, शनिबार / Sep 26, 2026
काठमाडौं । अर्थमन्त्री जर्नादन शर्मालाई फिर्ता बोलाउनेबारे माओवादी केन्द्रका नेताहरुले व्यापक छलफल गरेका छन् । पार्टीका शीर्ष नेताहरुका बीचमा अर्थमन्त्रीको काम कारवाहीको विषयलाई लिएर छलफल सुरु भएको हो ।
अर्थमन्त्रीको गतिविधिका कारण अब हामी धेरै नाङ्गिने ठाउँ छैन भन्दै नेताहरुले उनलाई फिर्ता बोलाउनुको विकल्प नरहेको शिर्ष नेताले बताए । अर्थमन्त्रीको विकल्प खोज्नुपर्ने कुरा उठेपछि प्रचण्डले शर्मालाई उनकै निवास खुमलटार बोलाएर छलफल गरेको बताएका छन् ।
अर्थमन्त्री शर्मासंग आइतबार दिउँसो चार बजे करिब दुई घण्टा छलफल भएको बताइएको छ । अर्थतन्त्र संकटमा रहेका बेला त्यसलाई सम्हाल्ने गरी काम गर्न नसकेको भन्दै शर्माको माओवादी र कांग्रेसभित्र आलोचना भइरहेको छ ।
शर्मालाई हटाउने कोसिस भएको भए पनि बजेट ल्याउने बेलामा नराम्रो सन्देश जाने भन्दै त्यसलाई बजेटपछि सारिएको एक नेताले बताए । ती नेताका अनुसार नारायणकाजी श्रेष्ठलाई अर्थमन्त्री बनाउनेमा छलफल भएको बुझिएको छ ।
