- १० श्रावण २०८३, आईतवार / Jul 26, 2026
लालबन्दी । भारत सरकारको अनुदान सहयोगमा निर्माण भएको श्रीफौद सिंह जनता मावि लालबन्दीको दुईतले भवन उद्घाटन भएको छ ।
नगरपालिका–१७, रानीगञ्ज, सर्लाहीमा निर्माण भएको उक्त भवनको मधेस प्रदेशका सामाजिक विकास मन्त्री नवलकिशोर साह र भारतीय महावाणिज्यदूत नितेश कुमारद्वारा संयुक्त रूपमा उद्घाटन भएको हो । शिक्षा क्षेत्रमा भारतको अनुदान सहयोग कार्यक्रम अन्तर्गत भवन निमार्ण गरिएको हो ।
कार्यक्रममा स्थानीय जनप्रतिनिधि, पदाधिकारी, रानीगञ्जका स्थानीयलगायत सरोकारवालाको उपस्थिति रहेको थियो ।
नयाँ विद्यालय भवनले ग्रामीण क्षेत्रमा शिक्षाको वातावरण सिर्जना गर्नुका साथै सर्लाही जिल्लामा शिक्षाको विकासमा टेवा पुर्याउने विश्वास लिइएको छ ।
नेपाल–भारत विकास सहयोग अन्तर्गत भारत सरकारको अनुदान पन्ध्र वटा कक्षा कोठा, दुईवटा सिँढी र सरसफाइ सुविधा सहितको दुई तल्ले विद्यालय भवन निर्माणमा प्रयोग गरिएको हो ।
