- ६ असार २०८३, शनिबार / Jun 20, 2026
काठमाण्डौ । देशभित्रकै उत्पादित अक्सिजन काफी रहेको सरकारले दाबी गरेको छ । अक्सिजन अभावले भारतमा धेरै सङ्क्रमितले ज्यान गुमाउनु परिरहेको भए पनि नेपालमा अक्सिजन ग्यास उत्पादनमा कुनै समस्या नरहेको स्वास्थ्य मन्त्रालयले जनाएको छ ।
अक्सिजन उत्पादक उद्योगीहरुसँग नियमित सम्पर्क भइरहेको प्रवक्ता डाक्टर जागेश्वर गौतमले बताए । चाहिने जति अक्सिजन देशभित्रै उत्पादन भइरहेको भन्दै अक्सिजन प्लान्ट रहेका अस्पतालहरुमा पूरै उत्पादन गर्नुपर्ने र प्लान्ट नभएका अस्पतालले तत्काल अक्सिजन लिएर राख्नु पर्ने गौतमले बताए ।
सरकारले देशभित्रकै उत्पादनले पुग्ने भने पनि देशभरका अस्पतामा सिलिन्डरको अभाव हुने चिकित्सकले बताएका छन् । सिलिन्डरको अभाव भएको तर दैनिक ३० हजारभन्दा धेरै बिरामीलाई अक्सिजन दिन सकिने नेपाल अक्सिजन उत्पादक सङ्घले जनाएको छ ।
तत्कालै ३० देखि ४० हजार सिलिन्डर आयात गर्न सरकारलाई सुझाव दिदै खाली भएको सिलिन्डर उद्योगसम्म पुर्याउने र उद्योगबाट अस्पतालसम्म पुर्याउन समय लाग्ने भएकाले धेरैजसो सिलिन्डर बाटोमै हुने र बिरामीको लागि थोरै मात्रै सिलिन्डर पुग्न सक्ने भएकाले तत्काल सिलिन्डर आयात गर्नुपर्ने देखिएको महासचिव नारायणदत्त तिमल्सिनाले बताए् । नेपालमा अहिले विभिन्न ठाउँमा २० वटा अक्सिजन उद्योग सञ्चालनमा छन् ।
