उखुको मूल्य बढ्यो, तर कति ?

काठमाडाैं । किसानलाई खेतीबाट विस्थापित गर्ने चाल खेलेको भन्दै उखु उत्पादक महासंघ सरकारले तोकेको मुल्यमा खेद प्रकट गरेको छ । सरकारले उखुको प्रतिक्वीन्टल न्यूनतम् समर्थन मूल्य ५ सय ४४ रुपैयाँ ३३ पैसा तोकेको छ ।

बिहीबार बसेको मन्त्रिपरिषद् बैठकले उखुको समर्थन मूल्य तोकेको हो । यसअघिको भन्दा ८ रुपैयाँ प्रतिक्वीन्टलले मुल्य बढाएको उद्योग, वाणिज्य तथा आपूर्ति मन्त्रालयले जनाएको छ । लागत, ढुवानी र मुनाफा जाडेर कृषि तथा पशुपन्छी विकास मन्त्रालयले गरेको सिफारिस बुधबार मन्त्रिपरिषदमा पेश भएको थियो ।

नयाँ मूल्यमा लागत ३ सय ८६ रुपैयाँ १६ पैसा, ढुवानी खर्च तथा मुनाफा ९२ रुपैयाँ ८९ पैसा र सरकारले दिने प्रतिक्वीन्टल अनुदान ६५ रुपैयाँ २८ पैसा रहेको मन्त्रालयकी उपसचिव एवं सहप्रवक्ता उर्मिला केसीले बताइन् । यस मुल्य प्रति उखु उत्पादक महासंघले आपत्ति जनाएको छ ।

चिनीको मूल्य एक किलोमा ३२ रुपैयाँले बढ्दा उखुको मूल्य भने निकै कम मात्रामा बढाउनु किसानलाई खेतीबाट विस्थापित गर्ने चाल भएको महासंघका अध्यक्ष कपिलमणि मैनालीको दावी छ । सरकार चिनी उद्योगीसामु झुकेको भन्दै नयाँ मूल्य स्वीकार नगर्न विभिन्न चिनीमिलहरुसँग छलफल तीव्र पारिएको र सोको घोषणा आइतबार गरिने मैनालीले जानकारी दिए ।