एउटाको भुडी बोकेर अर्कैसंग विवाह

८ असार २०७७ सप्तरी । १५ वर्षीया बालिकालाई बलात्कार गरेको आरोपमा सप्तरीको तिलाठी कोइलाडी गाउँपालिका–३ सकरपुराका एक जना मुखिया पक्राउ परेका छन् । पक्राउ पर्नेमा २५ वर्षीय लालबहादुर मुखिया छन् । आरोपितको बलात्कारबाट तीन महिनाको गर्भ रहेको भन्दै जिल्ला प्रहरी कार्यालयमा दिएको उजुरीका आधारमा पक्राउ गरिएको जिल्ला प्रहरी कार्यालय, सप्तरीले जनाएको छ ।

घाँस काट्न खोलाको चौरीतिर गएको बेला एक्लै भएको मौका छोपी लालबहादुरले भुइँमा पछारेर बलात्कार गरेको बताएपछि कारवाही अगाडि बढाइएको प्रहरी नायब उपरीक्षक तिलक भारतीले बताए । आरोपित लालबहादुरका एक छोरा र एक छोरी छन् ।

यसअघि गाउँमा भएको छलफलले गर्भवती बालिकाको विवाह वैशाख २८ गते गाउँकै १८ वर्षीय बालकसँग गरिदिएको स्थानीयले बताए। गाउँमा भएको पञ्चेतीमा बालिकाले एउटाको गर्भ रहेको बताए अहिले लालबहादुरको गर्भ भन्दै उजुरी दिएको उनीहरुको भनाई छ ।

बालिकाको बयानका आधारमा दुई जना पञ्चलाई समेत सोधपुछका लागि ल्याइएको र उनीहरूलाई तारेखमा रिहा गरिएको प्रनाउ भारतीले जानकारी दिए । लालबहादुरविरुद्ध बलात्कारको उजुरी दर्ता गरी थप अनुसन्धान थालिएको जानकारी दिए ।