एमसीसी सम्झौता खारेजीको माग

सुर्खेत । मध्यपश्चिम विश्वविद्यालयमा अध्यापनरत प्राध्यापनकहरूले नेपाल सरकारले संयुक्त राज्य अमेरिकी कम्पनी एमसीसीसंग गरेको सम्झौता खारेजीको माग गरेका छन् । नेपाल प्राध्यपाक समाज (नेप्रास) मध्यपश्चिम विवि एकाइ समितिले गरेको एक अन्तरक्रियामा वक्ताहरूले एमसीसी सम्झौताले नेपालको सार्वभौम अस्तित्व समाप्त पार्ने धारणा राखेका हुन ।

नेप्रासका अध्यक्ष सरोजराज गोसाईले एमसीसी अमेरिकाको हिन्दप्रशान्त सैन्य रणनीतिअन्तर्गत प्रस्ताब गरिएको परियोजना भएको भन्दै अमेरिकी सेनाले नेपालमा परेड खेल्ने र नेपाल युद्धभूमिमा परिणत हुने विचार बताए । उनले नेपालको विकास नेपालीकै पैसाले गर्न सकिने भन्दै विदेशीको हात थापेर नेपालको विकास सम्भव नभएको विगतबाट पुष्टि भएको तर्क गरे ।

केन्द्रीय अध्यक्ष गोसाईले नेका, एमाले, माओवादीजस्ता शासक पार्टी सबै एमसीसीकै पक्षमा भएको उल्लेख गर्दै एमसीसी पक्षधरहरूलाई जनताले सजाय दिने जिकिर गरे । मध्यपश्चिम विविको मानविकी सङ्कायका पूर्व डीन कमलेश डीसीले संरा अमेरिकाले आफ्नो प्रभुत्व लाद्न खोजेको भन्दै नेपालको संसद्बाट पारित गर्नु नै अमेरिकी दबनियत भएको बताए ।

उनले एमसीसी सम्झौता गर्नहरू संसद्बाट पारित गर्नेमा विश्वस्त नभएको भन्दै जनविरोध थेग्न नसेकेकै कारण एमसीसी पारित गर्न सरकारपछि हटेको बताए । मध्यपश्चिम विविका उपप्राध्यापक डा. पुष्पराज आचार्यले विदेशी भनेपछि हिनतावोध गर्ने संस्कृतिको कारण नेपाली अपमानित हुनुपरेको बताए । नेपालको सुरक्षासंग जोडिएको विषयमा नेपाली गम्भीर हुनुपर्ने उनले बताए ।

नेमकिपा, सुर्खेतका सदस्य गणेश खड्काले भारतलाई प्रयोग गरी नेपालबाट चीनलाई हान्ने उद्देश्यले नेपालमा एसीसी परियोजना ल्याइएको बताए । नेपाल क्रान्तिकारी विद्यार्थी सङ्घका केन्द्रीय संयोजक प्रकाश गुरुङले एमसीसी सम्झौताबारे पावरप्वाइन्ट प्रस्तुति राख्दै देशको सार्वभौमिकता रक्षाको निम्ति युवाविद्यार्थी सङ्घर्ष गर्न तयार रहेको बताए ।